Moti i nxehtë: Gjenden rreth 10 ton peshk i ngordhur në liqenin francez ndërsa temperatura e ujit arrin 29 gradë
Gati dhjetë ton peshk janë gjetur të ngordhur në liqenin Enghien-les-Bains në Val-d’Oise, në Francën veriore, për shkak të valës së fundit të nxehtit që goditi rajonin, shpjeguan zyrtarët të Premten.
Jean-Pierre Enjalbert, president i SIARE, sindikata e përbashkët e ngarkuar me menaxhimin e ujërave lokale, tha se “nxehtësia dhe mungesa e furnizimit me ujë të pastër dhe të freskët” rezultuan në një rënie të oksigjenit në liqen, duke shkaktuar ngordhjen e peshkut.
Niveli i këtij liqeni artificial prej 40 hektarësh, mesatarisht një metër i thellë, ka rënë me afro 20 cm, dhe temperatura e ujit arrin 29 gradë gjatë valës së nxehtësisë, sipas këshillit të qytetit të Enghien.
Autoritetet tani kanë krijuar një sistem të oksigjenimit të ujit dhe kanë planifikuar një pellg në rrjedhën e sipërme të filtrimit.
Shoqata e kafshëve Paris Animaux Zoopolis (PAZ) tha që kjo katastrofë ishte “e parashikueshme”, dhe më parë kishte kërkuar që një sistem i tillë pompimi të zhvillohej, duke pasur parasysh valën e ardhshme të nxehtësisë.
PAZ tani është e shqetësuar se një “katastrofë e dytë” mund të përfshijë zogj vendas për shkak të cilësisë së dobët aktuale të ujit. Liqeni është i njohur për pritjen e specieve të rralla.(EN)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.