Moti për ditën e Premte/ SHMU: Reshje në formën e shtrëngatave dhe stuhi me shkarkesa elektrike

Shërbimi Meteorologjik Ushtarak njofton se për ditën  e Premte vendi ynë parashikohet të jetë nën ndikimin e masave ajrore të paqëndrueshme  ndërsa moti parashikohet me vranësira dhe intervale kthjellimi.

Sipas njoftimit do të ketë reshje shiu të herëpashershme që në orët e para të 24-orëshit,  fillimisht në veri dhe qendër,  gradualisht reshjet do të shtrihen edhe në jug të vendit të cilat parashikohen të jenë me intensitet deri mesatar, hera-herës  në formën e shtrëngatave dhe stuhive shoqëruar me shkarkesa elektrike.

SHMU informon se lokalisht reshjet do të jenë dhe në formën e breshrit ndërsa era do të fryjë me drejtim jugperëndim – veriperëndim me shpejtësi 1 deri 8 m/sek, hera-herës përgjatë vijës bregdetare dhe në momentin e zhvillimit të vranësirave era fiton shpejtësi deri në 15m/sek.

Temperaturat parashikohen:

• vendet malore 13°C deri në 29°C
• vendet e ulëta 17°C deri në 33°C
• vendet bregdetare 16°C deri në 30°C.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.