Mpiksja e rrallë e gjakut – Rreziku është më i lartë nga Covid-19 sesa nga vaksinimi

Sipas një studimi në Britani, rreziku i mpiksjes së rrallë të gjakut është dukshëm më i lartë nëse një person preket nga Covid-19, sesa nga vaksinimi kundër virusit. Në studim u analizuan të dhënat e më shumë se 29 milionë njerëzve që kanë marrë dozën e parë të vaksinës së AstraZeneca apo Pfizer.

Rreziku i mpiksjes së rrallë të gjakut është dukshëm më i lartë nëse një person preket nga Covid-19, sesa nga vaksinimi kundër virusit, sipas një studimi të fundit. Në këtë studim të rishikuar, të botuar në Revistën Mjekësore Britanike, shkencëtarët e Universitetit të Oksfordit dhe të disa institucioneve dhe universiteteve të tjera analizuan të dhënat e më shumë se 29 milionë njerëzve që kanë marrë dozën e parë të vaksinës së AstraZeneca apo Pfizer.

Studimi krahasoi normat e mpiksjes së rrallë të gjakut, pas dozës së parë të vaksinës dhe pas një testi pozitiv me Covid-19. Studiuesit zbuluan se rreziku i këtyre ngjarjeve negative ishte “shumë më i lartë” pas infeksionit me koronavirus, sesa pas marrjes së vaksinës së AstraZeneca apo Pfizer. Nga 8 deri në 28 ditë pas marrjes së dozës së parë të vaksinës së AstraZeneca, studiuesit identifikuan një rrezik në rritje të mpiksjes së gjakut dhe një numër të ulët të trombociteve.

Në të njëjtën periudhë kohore pas dozës së parë të vaksinës së Pfizer, studimi zbuloi se rreziku i mpiksjes së gjakut dhe goditjeve të shkaktuara nga qarkullimi i kufizuar i gjakut në tru, u rrit. Megjithatë, këto rreziqe janë shumë më të ulëta sesa nga rreziku i infektimit me Covid-19.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.