Muaji më i keq që prej 2009 – Bursat amerikane, tetori rikthen “fantazmat” e krizës financiare

Muaji tetor për Wall Street duket se do të jetë më i dobëti që prej vitit 2009.

Kjo rënie vjen pavarësisht të dhënave që flasin për një ecuri të shkëlqyer të ekonomisë amerikane gjatë tremujorit të tretë, në rritje me 3.5%. E Premtja ka qenë një ditë për t`u harruar për tregjet e aksioneve në Shtetet e Bashkuara të Amerikës.  Shtysa vjen nga vala që ka goditur sektorin teknologjik.

Nasdaq e ka mbyllur kështu të Premten në minus 2%, Dow Jones në -1.2% dhe S&P 500 në -1.7%. Indeksi Dow Jones në vetëm pak javë ka zeruar fitimet e të gjithë vitit.

Tetori, është muaji më i keq për investitorët e tregjeve amerikane që prej krizës financiare globale. Arsyet e kësaj rënie të ndjeshme janë disa. Së pari, lufta tregtare dhe fundi i politikës së lehtësimit sasior në shkallë të gjerë.

Të dyja këto shkaktojnë emocione negative te investitorët, të cilat më pas përkthehen në shitje masive, dhe rënie të aksioneve për rrjedhojë. Së dyti, të dhënat që flasin për një frenim të sektorit teknologjik. Të dhënat e Amazon, gjigandit të tregtisë me pakicë online, janë shembulli më i freskët i kësaj ecurie.

Roel Korkuti /SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.