Mumia ‘e zbërthyer dixhitalisht’ ishte një faraon i shëndetshëm me ‘dhëmbë të bukur’ i 3500 viteve më parë! (FOTOT)
Shkencëtarët egjiptianë kanë zbërthyer në mënyrë dixhitale mumien 3500-vjeçare të faraonit Amenhotep I, duke zbuluar më në fund disa nga sekretet e saj pasi eshtrat e mbretit u zbuluan në vitin 1881 në Egjiptin jugor. Hulumtimi jo-invaziv u mundësoi shkencëtarëve të zbulonin fytyrën e Amenhotep dhe të përcaktonin moshën dhe shëndetin e tij në kohën e vdekjes së tij.
Mbetjet e faraonit, i cili sundoi afërsisht midis 1525-1504 pes, u zbuluan në Deir Al Bahari në 1881 dhe kishin mbetur të mbështjella derisa egjiptologu Zahi Hawass dhe profesori i Universitetit të Kajros Sahar Saleem nisën një studim të thelluar në vitin 2019.
E zbukuruar me kurora lulesh dhe një maskë prej druri për fytyrën, mumia e Amenhotep ishte aq e brishtë sa arkeologët nuk kishin guxuar kurrë të ekspozonin mbetjet më parë, duke e bërë atë mumien e vetme mbretërore egjiptiane të gjetur në shekujt 19 dhe 20 që nuk ishte hapur ende për studim.
Hawass dhe Saleem përdorën teknologji të avancuar me rreze X, skanime tomografie të kompjuterizuara dhe softuer dixhital për të hartuar mumien me detaje të shkëlqyera, pa e hequr atë nga asnjë nga shiritat e saj. Ekipi zbuloi gjithashtu se mbreti kishte qenë sundimtari i parë që u balsamos me parakrahët e tij të kryqëzuar në të ashtuquajturin pozicion Osiris.
Përveç kësaj, ata gjetën amuletë dhe një brez të zbukuruar me rruaza ari nën mbështjelljen e mumies. Sipas egjiptologëve, Amenhotep I ishte faraoni i fundit truri i të cilit nuk u hoq nga kafka e tij në kohën e mumifikimit të tij. Studiuesit nuk ishin në gjendje të gjenin ndonjë lëndim ose sëmundje që mund të kishte shkaktuar vdekjen e Amenhotep dhe spekuluan se ai mund të kishte vdekur nga një atak në zemër.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.