Mund të importojmë maska nga BE/ KE pranon kërkesën e ministrave të jashtëm. Rajoni përjashtohet nga ndalimi i eksportit!

Letra e dërguar nga 6 vendet e Ballkanit Perëndimor drejt 3 zyrtarëve të lartë të Komisionit Europian duket se nuk ka rënë në vesh të shurdhër. Krahu ekzekutiv i Bashkimit Europian ka miratuar një rregullore të re, me aplikim 30 ditor, duke filluar prej datës 26 prill, e që ndalon eksportin e mjeteve mbrojtëse mjekësore. Por, me draftin e ri, nga ndalimi për eksport do të përjashtohen 6 vendet e Ballkanit Perëndimor, pra edhe Shqipëria, si dhe vendet e Efta-s, Islanda, Lichtenschtein, Norvegjia dhe Zvicra.

Të 6 vendet e Ballkanit Perëndimor tashmë do të trajtohen si vende europiane sa i përket importit të këtyre produkteve. Gjashtë ministrat e jashtëm kishin kërkuar nga Komisioni Europian të përjashtoheshin nga rregulli që ndalonte eksportet e këtyre produkteve, pasi po hasin vështirësi të mëdha për t`i importuar, duke u justifikuar edhe me faktin se një treg i vogël i Ballkanit Perëndimor, prej vetëm 17 milionë banorësh, e bën të papërfillshme ndikimin në një treg si ai i Bashkimit Europian.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.