Mungesa e çipeve tek industria e makinave / Stellantis, “lojtari” i katërt më i madh në botë pret përkeqësim
Stellantis, prodhuesi i katërt më i madh në botë i makinave, pret një goditje më të madhe në prodhim këtë tremujor nga mungesa botërore e gjysmëpërçuesve, krahasuar me 3 muajt e para të vitit. Grupi, i formuar në nisje të vitit nga shkrirja e Fiat-Chrysler me francezen PSA, deklaroi se të ardhurat për tremujorin e parë u rritën me 14% në 37 miliardë euro, duke reflektuar kërkesën e fortë konsumatore dhe shitjet më të mëdha të makinave me çmim të lartë.
Megjithatë, kompania deklaroi se humbjet në prodhim në tremujorin e kaluar për shkak të mungesës së çipeve kanë zhbërë rimëkëmbjen nga ndalimi i përkohshëm i prodhimit në të njëjtën periudhë një vit më parë, prej pandemisë. Humbjet nga mungesa e çipeve arritën në një total prej rreth 11% të prodhimit të planifikuar në tremujorin e parë, apo në rreth 190,000 makina, sipas Stellantis, që shtoi se tremujori i dytë do të ketë një goditje më të keqe. Mungesa e çipeve po ndikon 8 nga 44 fabrikat e montimit dhe këto çështje pritet të ndikojnë të gjithë industrinë vitin e ardhshëm.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.