Mutacioni i Sars-Cov2 në Angli – Avionët nga Britania ulen në Tiranë, 3 fluturime të tjerë në 22 dhjetor
Teksa Britania e Madhe u bë shteti i parë që nisi vaksinimin për COVID-19 me vaksinën e Pfizer, lajmi se një variant i ri i koronavirusit po përhapet me shpejtësi në këtë shtet ka ngritur shqetësime te autoritetet vendase, por jo vetëm.
Shumë shtete kanë nisur të aplikojnë politikën e ndalimit të fluturimeve me Anglinë, duke synuar frenimin e depërtimit të mutacionit të ri në shtetet e tyre. Ndërkohë që, Shqipëria regjistron një numër të konsiderueshëm fluturimesh me këtë shtet, duke bërë që rreziku të jetë prezent edhe për vendin tonë.
Sipas të dhënave nga Aeroporti “Nënë Tereza”, të hënën një avion i kompanisë Wizzair nga Londra u ul në Tiranë në orët e para të mëngjesit të së hënës.
Ndërkohë që, për datën 22 dhjetor janë parashikuar edhe 3 fluturime të tjerë, që do të mbërrijnë në aeroportin “Nënë Tereza” deri në mesditë. Aktualisht, Shqipëria nuk aplikon asnjë masë kufizuese në drejtim të lëvizjeve të shtetasve shqiptarë apo të huaj.
Këtu përfshihen edhe politikat e karantimit të detyrueshëm, që në vendin tonë nuk janë prezente. Ndërkaq, numri i shtetasve të huaj që hyjnë nga Anglia nuk është i vogël. Sipas të dhënave të fundit të publikuara nga INSTAT, në muajin shtator nga ky shtet hynë 4.247 shtetas, ndërsa në tetor 3 973 shtetas.
Përgjatë gjithë vitit 2020, numri total i shtetasve të huaj nga Britania e Madhe arriti në 47,298 vetë. Ndërkaq, është Komiteti Teknik i Ekspertëve ai që do të duhet të marrë një vendim nëse fluturimet me këtë shtet do të ndalohen apo nëse do të aplikohen masat e karantimit për të gjithë shtetasit që do të futen në territorin shqiptar.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.