MZHETTS paralajmëron agjencitë e huaja turistike – Turet pa udhërrëfyes të certifikuar dënohen me gjobë
Ministria e Zhvillimit Ekonomik, Turizmit, Tregtisë dhe Sipërmarrjes ka nxjerrë një njoftim për të gjithë udhërrëfyesit turistikë dhe operatorët turistikë të huaj, sa i përket veprimtarisë së tyre në territorin e Shqipërisë.
Ministria u kujton se asnjë person nuk mund të ushtrojë veprimtarinë e udhërrëfyesit turistik pa u pajisur më parë me certifikatën përkatëse nga kjo ministri, siç e parashikon ligji për turizmin dhe vendimi i qeverisë i tetorit të vitit të kaluar.
Grupet e inspektimit do të verifikojnë nëse operatorët turistikë të huaj kanë lidhur ose jo një kontratë shërbimi me udhërrëfyesit turistik të certifikuar, ose me një operator turistik shqiptar.
Në të kundërt, udhërrëfyesit e huajt që ushtrojnë këtë veprimtari, pa qenë të shoqëruar nga një udhërrëfyes turistik i certifikuar, do të dënohen me një gjobë prej 150 mijë lekësh.
MZHETTS i ka bashkangjitur njoftimit edhe numrin e telefonit të Inspektoriatit Shtetëror të Mbikëqyrjes së Tregut (0800 1313), i cili ushtron kontroll dhe merr masat për shkeljet e konstatuara.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.