Nafta bie ndjeshëm – Stuhia Gordon nuk shkakton dëme në Gjirin e Meksikës
Çmimet e naftës po qëndrojnë në rënie edhe në sesionin e sotëm, duke zgjeruar humbjet e sesionit të kaluar, për shkak se stuhia që goditi Gjirin e Meksikës u dobësua shumë, duke mos shkaktuar asnjë dëm.
Për këtë arsye, edhe në sesionin e kaluar çmimet u kthyen në rënie, ndërsa më herët gjatë sesionit ishin në rritje deri në 2%. Në këtë mënyrë, janë zbehur lajmet për rënien e rezervave në SHBA dhe vendosjen e sanksioneve ndaj Iranit.
Të hënën dhe pjesërisht të martën çmimet e naftës u rritën ndjeshëm për shkak mbylljes së disa platformave të naftës në Gjirin e Meksikës për shkak të stuhisë Gordon.
Nafta Brent e Londrës po tregtohet në rreth 77.1 dollarë për fuçi, ndërsa në sesionin e kaluar u deri në 79.72 dollarë për fuçi, niveli më i lartë që nga maji.
Nafta Bruto amerikane po tregtohet në rreth 68.8 dollarë për fuçi. Gjithsesi, investitorët janë në pritje të të dhënave mbi rezervat e naftës në SHBA, që parashikohen në rënie me 1.9 milionë fuçi gjatë javës së kaluar. Që nga muaji prill, nafta Brent e Londrës po tregtohet midis 70 dhe 80 dollarë për fuçi.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.