Nafta e mbyll javën në rënie – Vendet e BE, të ndara për embargon ndaj Rusisë. Rriten kostot e tregtimit!

Nafta është tregtuar në rënie në sesionin e fundit të kësaj Jave, ndërkohë që vendet e Bashkimit Europian nuk arritën në një konsensus mbi embargon e naftës ruse. Shtetet e Bashkuara dhe vendet aleate konsideruan gjithashtu të nxjerrin më shumë naftë nga rezervat emergjente, për të zbutur tregun.

Nafta brent e Londrës, ra me 2.03% në 116.73 dollarë për fuçi, pas humbi 2.1% në sesionin e mëparshëm.  Nafta bruto amerikane, ra me 2.09% në 109.99 dollarë për fuçi, pasi humbi mbi 2.3% në tregtinë e kaluar.

Megjithatë, të dy kontratat po i drejtohen rritjes së parë javore në 3, me naftën brent që pritet të tregojë rritje me 10% dhe naftën bruto, me 7%, prej shqetësimeve të tkurrjes së ofertës, ndërkohë që Europa lajmëroi se po planifikon një embargo të naftës ruse.

Burimet e OPEC theksuan se një ndalim i mundshëm e importit të naftës ruse nga BE do të dëmtonte konsumatorët. Pavarësisht se SHBA dhe Britania e kanë shënjestruar naftën ruse, një veprim i tillë përbën sfida për BE, që varet tek Rusia për 40% të nevojave për gaz.

Ndërkohë që inventarët botërorë ndodhen në nivelin më të ulët që prej vitit 2014, tregu është tejet i cenuar në rast të një ndërprerjeje të ofertës. Shqetësimet mbi ofertën u rritën gjithashtu pasi një terminal i naftës në gjirin rus të Detit të Zi, ndaloi eksportet pasi u dëmtua nga një stuhi e madhe.

Kazakistani deklaroi se pret që terminali të rinisë dërgesat brenda 1 muaji, por shtoi se mund të ndryshojë itinerarin e një pjese të naftës drejt çisternave të Detit Kaspik dhe tubacioneve që shkojnë në Rusi dhe Kinë.

Duke reflektuar luhatshmërinë në treg, Bursa Ndërkontinentale (ICE), rriti marzhet për kontratat futures të naftës Brent për Majin me 19%,  duke shënuar rritjen e tretë për këtë vit dhe duke e bërë më të shtrenjtë për t’u tregtuar.

Normat e ardhshme të marzhit rriten kur tregjet ndodhen në luhatje, ç’ka detyron tregtarët të rrisin depozitën që mbajnë për çdo kontratë, depozitë që vërteton se mund të respektojnë detyrimet.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.