Nafta e mbyll javën në rritje – OPEC ul ndjeshëm prodhimin gjatë dhjetorit të 2018
Çmimet e naftës janë rritur me mbi 1% në sesionin e fundit të kësaj jave, për shkak se të dhënat e Organizatës së Vendeve Eksportuese të Naftës treguan se, prodhimi ra ndjeshëm gjatë muajit të kaluar.
Këto të dhëna kanë larguar përkohësisht frikën se, tregu do të përballet për një kohë të gjatë me mbifurnizim. Nafta Brent e Londrës po tregtohet në rreth 61.8 dollarë për fuçi, ndërsa gjatë kësaj jave ka fituar rreth 2% të vlerës.
Nafta Bruto amerikane po tregtohet në rreth 52.6 dollarë për fuçi. Të dy bençmarkët pritet të publikojnë fitime për të tretën javë me radhë. Raporti mujor i OPEC tregoi se prodhimi ra ndjeshëm, gjatë dhjetorit, kur nuk kishte hyrë ende në fuqi marrëveshja për uljen e prodhimit me 1.2 milionë fuçi në ditë, duke filluar nga 1 janari.
Në anën tjetër, prodhimi në SHBA vijon rritjen. Agjencia Ndërkombëtare e Energjisë deklaroi të premten se, rritja e prodhimit të naftës në Shtetet e Bashkuara, e kombinuar me ngadalësimin e ekonomisë globale, i kanë vendosur çmimet nën presion.
Ndërkohë, tregu gjeti një mbështetje nga shenjat se Shtetet e Bashkuara dhe Kina do të zgjidhin konfliktin tregtar, gjatë bisedimeve që do të zhvillohen më 30 janar.
Wall Street Journal raportoi se, SHBA po konsideron heqjen e disa tarifave të vendosura ndaj importeve kineze. Megjithatë, një zëdhënës i qeverisë e përgënjeshtroi raportin.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.