Nafta e nis javën në rritje – Djali i Mbretit saudit emërohet ministër i energjisë

Çmimet e naftës po qëndrojnë në rritje gjatë sesionit të sotëm, për shkak të pritshmërive se, nën drejtimin e ministrit të ri të energjisë, Abdulaziz bin Salman, Arabia Saudite, që është eksportuesi më i madh i naftës në botë do të vijojë të mbështesë uljen e prodhimit nga OPEC dhe Rusia. Në këtë mënyrë, dy bençmarkët kryesorë po publikojnë fitime për të katërtin sesion me radhë.

Nafta Brent e Londrës, që është bençmarku global, po tregtohet në rreth 62 dollarë për fuçi, ndërsa nafta Bruto amerikane po tregtohet në rreth 57 dollarë për fuçi. Ditën e sotme, Abdulaziz bin Salman, një anëtar i vjetër i delegacionit saudit pranë OPEC u emërua ministër i energjisë, duke zëvendësuar Khalid al-Falih. Ai është djali i Mbretit Salman të Arabisë Saudite dhe është hera e parë që portofoli i energjisë i jepet një anëtari të familjes mbretërore.

Salman ndihmoi në negocimin e marrëveshjes aktuale për uljen e prodhimit mes OPEC dhe vendeve të tjera që nuk janë pjesë e organizatës, me në krye Rusinë. Megjithatë, tensionet tregtare dhe gjeopolitike vijojnë të ushtrojnë presion mbi çmimet e naftës. Kjo ka bërë që institucione të ndryshme të parashikojnë një rënie të çmimeve për pjesën e mbetur të këtij viti. Gjatë sesionit të sotëm, çmimet u mbështetën edhe nga rritja e importeve të naftës nga Kina, gjatë gushtit. Sipas të dhënave zyrtare, importet u rritën me 3%, krahasuar me korrikun dhe me rreth 10% për 8-muajt e parë të këtij viti.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.