Nafta falas për fermerët/ Shpallet tenderi – 97 milionë lekë për krijimin e platformës së posaçme

Agjencia Kombëtare e Shoqërisë së Informacionit ka shpallur një tender me fond 97 milionë lekë, për Ministrinë e Bujqësisë. Tenderi flet për krijimin e një sistemi të posaçëm për shpërndarjen dhe monitorimin e karburantit për fermerët.

“Nëpërmjet këtij sistemi, skema e karburantit për bujqësinë do të mund të menaxhohet që nga aplikimi i subjekteve (fermerë individualë, persona fizikë dhe juridikë), kontrolli administrimit dhe aprovimit të aplikimeve,  shpërndarja e kartave të karburantit te subjektet përfituese, gjurmimi i shpërndarjes së karburantit për subjektet dhe verifikimi i punimeve/kultivimeve bujqësore në terren” specifikohet në dokumentacionin bashkangjitur tenderit.

Ndër të tjera, sistemi pritet se do të ndërveprojë me platformën e – Albania, për pritjen e aplikimeve dhe komunikimin me subjektet fituese, sipas fazave dhe procedurave.

Shpallja e tenderit vjen në kuadër të skemës së re mbështetëse për bujqësinë, ku fermerët do të mund të përfitojnë mesatarisht nga 70-100 litra naftë falas për çdo hektarë tokë të mbjellë, në varësi të kulturave bujqësore.

Sipas detajeve të tenderit, sistemi do të realizohet brenda një afati kohor 4 mujor.

Jenida Vladi/ SCAN

Lexo edhe:

Nafta falas për fermerët/ Rama: Tashmë mund të aplikoni edhe online në portalin e-Albania

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.