Nafta i rikthehet humbjeve – Ndikon rritja e rezervave në SHBA dhe tërheqja e fitimeve
Çmimet e naftës i janë rikthyer humbjeve në sesionin e sotëm, duke u tërhequr lehtë nga niveli më i lartë në 3 vitet e fundit të regjistruar në sesionin e kaluar. Rritja e rezervave të karburanteve në SHBA dhe e prodhimit kanë ushtruar presion mbi çmimet. Nafta Brent e Londrës po tregtohet në rreth 73.7 dollarë për fuçi, ndërsa nafta Bruto amerikane po tregtohet në rreth 67.5 dollarë për fuçi.
Pavarësisht rënies në sesionin e sotëm, që sipas tregtarëve vjen edhe për shkak të tërheqjes së fitimeve, analistët mendojnë se periudha e mbifurnizimit të tregut, që filloi në vitin 2014, tashmë ka përfunduar për shkak të uljes së prodhimit nga OPEC dhe kërkesës së fortë. Që në fillim të vitit 2017, OPEC, Rusia dhe disa prodhues të tjerë vendosën të ulin prodhimin me 1.8 milionë fuçi në ditë. Kjo marrëveshje është në fuqi deri në fund të këtij viti, por mund të shtrihet edhe në 2019.
Referuar të dhënave të tjera, prodhimi në SHBA është rritur në 10.54 milionë fuçi në ditë, duke dëmtuar disi marrëveshjen për uljen e prodhimit. Në anën tjetër, rezervat e naftës bruto në SHBA u rritën me 1.1 milionë fuçi gjatë javës që u mbyll më 20 prill, në totalin e 429.1 milionë fuçive.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.