Nafta luhatet minimalisht – Analistët, të bindur se ulja e prodhimit do të shtyhet
Çmimet e naftës po ndryshojnë shumë pak në sesionin e sotëm, ndërsa nafta Brent e Londrës po qëndron mbi 60 dollarë për fuçi. Investitorët janë të bindur tashmë se, marrëveshja e OPEC për uljen e prodhimit, që skadon në mars të 2018, do të zgjatet me të paktën 9 muaj.
Në anën tjetër, fitimet po kufizohen nga rritja e eksporteve të Irakut. Nafta Brent e Londrës po tregtohet mbi 60.5 dollarë për fuçi, ndërsa nafta bruto amerikane po tregtohet pranë 54 dollarëve për fuçi.
Organizata e Vendeve Prodhuese të Naftës, OPEC, plus Rusia dhe nëntë vende të tjera, kanë rënë dakord të ulin prodhimin me 1.8 milionë fuçi në ditë, nga janari i këtij viti, deri në mars të 2018.
Por, gjatë javës së kaluar, Arabia Saudite dhe Rusia u shprehën pro shtyrjes së kësaj marrëveshjeje. OPEC do të takohet zyrtarisht më 30 nëntor, në zyrat qendrore në Vjenë.
Analistët shprehen se, rritja e eksporteve me 900 mijë fuçi në ditë nga Iraku, në një total prej 4.6 milionë fuçi në ditë, ka parandaluar rritjen e naftës Brent.
Në anën tjetër, prodhimi në Shtetet e Bashkuara të Amerikës është 13% më i lartë, krahasuar me mesin e vitit 2016. Por, pavarësisht këtyre zhvillimeve, disa analistë po tregohen të kujdesshëm, duke u bazuar në indikatorët e analizave teknike.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.