Nafta ndryshon minimalisht – Ndikojnë shenjat për ngadalësimin e ekonomisë globale
Çmimet e naftës po ndryshojnë minimalisht gjatë sesionit të parë të kësaj jave, por po gjenden nën presion për shkak të shqetësimeve mbi ngadalësimin e ekonomisë globale. Për këtë arsye, nafta pritet të publikojë humbjet më të mëdha mujore që nga mesi i vitit 2016. Nafta Brent e Londrës po tregtohet në rreth 77.3 dollarë për fuçi, ndërsa nafta Bruto amerikane po tregtohet në rreth 67.3 dollarë për fuçi. Edhe diferenca mes dy bençmarkëve kryesorë është ngjitur sërish në 10 dollarë, në favor të naftës Brent.
Pavarësisht sanksioneve amerikane ndaj eksporteve iraniane të naftës, që hyjnë në fuqi në 4 nëntor, çmimet kanë rëne me rreth 7%, gjatë tetorit. Lëndët e para industriale, si nafta dhe bakri, janë gjendur nën presion për shkak të fitimeve të dobëta të koraporatave, frikës për përshkallëzimin e tensionit tregtar SHBA-Kinë dhe forcimit të dollarit amerikan.
Përsa i përket furnizimit të tregut, Irani ka filluar të shesë naftë te kompanitë private, përmes një platforme të brendshme, për herë të parë në histori. Vetëm disa ditë përpara hyrjes në fuqi të sanksioneve, tre ndër pesë blerësit më të mëdhenj të naftës iraniane – India, Kina dhe Turqia, po i rezistojnë thirrjes së Uashingtonit për të mos blerë naftë nga ky vend.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.