Nafta ndryshon minimalisht – Trazirat e vendeve në zhvillim shtojnë presionin në treg
Çmimet e naftës po ndryshojnë minimalisht gjatë ditë së sotme, por po gjenden nën presion për shkak të trazirave në tregjet në zhvillim dhe afrimit të afatit për aplikimin e tarifave të reja nga Shtetet e Bashkuara ndaj 200 miliardë dollarë produkte kineze. Por, në anën tjetër, çmimet po gjejnë një mbështetje nga sanksionet amerikane ndaj Iranit që hyjnë në fuqi në fillim të nëntorit.
Nafta Bruto amerikane po tregtohet në rreth 68.59 dollarë për fuçi, ndërsa nafta Brent e Londrës po tregtohet në rreth 77.2 dollarë për fuçi. Trazirat që kanë përfshirë tregjet e vendeve në zhvillim mund të dëmtojnë ekonominë globale. Për këtë arsye, bursat aziatike publikuan humbje për të gjashtin sesion me radhë. Ndërkohë, janë të larta mundësitë që presidenti amerikan Donald Trump, të firmosë tarifat e reja prej 200 miliardë dollarë ndaj produkteve kineze.
Referuar të dhënave të publikuara në SHBA, rezervat e naftës ranë me 1.7 milionë fuçi, gjatë javës së kaluar, në totalin e 404.5 milionë fuçive. Analistët parashikonin një rënie të rezervave me 1.9 milionë fuçi. Në anën tjetër, Organizata e Vendeve Eksportuese të Naftës, OPEC, deklaroi se parashikon që kërkesa globale për naftë të kalojë nivelin e 100 milionë fuçi në ditë, gjatë këtij viti, që do të jetë hera e parë në histori. Një tjetër rrezik për tregun e naftës është edhe kriza ekonomike dhe politike në Venezuelë, që ka përgjysmuar prodhimin në rreth 1 milion fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.