Nafta, në rënie të konsiderueshme – OPEC pritet të rrisë prodhimin për të kompensuar Iranin

Çmimet e naftës po qëndrojnë në rënie të konsiderueshme në sesionin e fundit të javës, për shkak të pritshmërive se OPEC do të rrisë prodhimin, për të kompensuar rënien e eksporteve nga Irani, pas sanksioneve të Shteteve të Bashkuara.

Megjithatë, çmimet pritet të publikojnë sërish fitime javore, kryesisht për shkak të marrëveshjes së OPEC dhe Rusisë për të ulur prodhimin me 1.2 milionë fuçi në ditë dhe sanksioneve amerikane ndaj Iranit dhe Venezuelës. Nafta Brent e Londrës po tregtohet në rreth 74.2 dollarë për fuçi, ndërsa nafta Bruto amerikane po tregtohet në rreth 64.9 dollarë për fuçi. Në sesionin e kaluar, nafta Brent u rrit mbi 75 dollarë, për herë të parë për këtë vit, pasi Gjermania, Polonia dhe Sllovakia pezulluan importet nga Rusia, për shkak të cilësisë së dobët.

Nafta Bruto amerikane pritet të publikojë fitime për të tetën javë me radhë, seria më e gjatë e fitimeve që nga fillimi i vitit 2015. Brenti i Londrës pritet të publikojë fitime për të pestën javë me radhë. Të hënën, ndërkohë, Uashingtoni deklaroi se do të shtojë sanksionet ndaj naftës iraniane. Por, pavarësisht kësaj analistët mendojnë se eksportet e Iranit nuk do të bien në zero, siç pretendon qeveria amerikane. Sipas analistëve, Kina, India dhe me shumë mundësi edhe Turqia do të vijojnë të blejnë naftën e Teheranit.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.