Nafta, në rënie të lehtë – Humbjet kufizohen nga rritja e tensioneve në Lindjen e Mesme
Çmimet e naftës po qendrojnë në rënie në sesionin e sotëm, por megjithatë mundësitë që Irani të përballet me sanksione nga SHBA po kufizojnë humbjet. Nafta Brent e Londrës po tregtohet në rreth 74.6 dollarë për fuçi, pas rritjes me rreth 1% në sesionin e kaluar. Ndërsa nafta Bruto amerikane po tregtohet në rreth 68 dollarë për fuçi.
Nafta Brent e Londrës pritet të publikojë fitime për të tretën javë me radhë në mbyllje të sesionit të sotëm. Analistët mendojnë, se pavarësisht rënies, çmimet po gjejnë një mbështetje nga mundësitë për çrregullimin e tregut, sidomos nga Lindja e Mesme, nëse Shtetet e Bashkuara do të tërhiqen nga marrëveshja bërthamore me Iranin. Presidenti amerikan, Donald Trump do të vendosë deri më 12 maj, nëse do të rikthejë ose jo sanksionet ndaj Teheranit. Gjatë këtij muaji, nafta Brent ka fituar rreth 6% të vlerës.
Shqetësimet për uljen e furnizimit të tregut global janë shtuar pas përshkallëzimit të situatës ekonomike dhe politike në Venezuelë, që është përballur me një rënie prej 40% të prodhimit të naftës, gjatë dy viteve të fundit. Në anën tjetër, vijon presioni konstant mbi çmimet, që buron nga rritja e prodhimit në SHBA.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.