Nafta, në rënie të lehtë – Humbjet kufizohet nga tensioni mes SHBA dhe Iranit
Çmimet e naftës po qëndrojnë në rënie në sesionin e sotëm, për shkak të rritjes së dollarit amerikan, që po tregtohet pranë nivelit më të lartë në 4 muajt e fundit, përballë shportës me monedhat kryesore ndërkombëtare.
Nafta Bruto amerikane po tregtohet në rreth 68.5 dollarë për fuçi, ndërsa nafta Brent e Londrës po tregtohet pranë 74.7 dollarëve për fuçi.
Në sesionin e së hënës, ndërkohë, çmimet u kthyen në rritje në orët e pasdites, për shkak të komenteve të kryeministrit të Izraelit, Benjamin Netanyahu, i cili rriti presionin ndaj SHBA për të rikthyer sanksionet ndaj Iranit.
Ai prezantoi disa fakte sekrete, sipas të cilave Irani po vijon me prodhimin e armëve bërthamore. Gjithsesi, volumi i tregtisë ka qenë i ulët, për shkak se shumë tregje po gjendrojnë pushim, duke përfshirë Kinën, Indinë dhe Singaporin, me rastin e ditës ndërkombëtare të punëtorëve.
Analistët shprehen se, tregu është shumë i ndjeshëm ndaj zhvillimeve që kanë të bëjnë me Iranin, pasi ekziston një mundësi e madhe që Shtetet e Bashkuara të rikthejnë sanksionet.
Në anën tjetër, sipas një vëzhgimi të Reuters, prodhimi i OPEC ra në nivelin më të ulët në një vit, gjatë prillit, kryesisht për shkak të rënies së prodhimit në Venezuelë dhe në disa vende afrikane.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.