Nafta, në rënie të lehtë – Investitorët e cilësojnë si një sesion pauze
Çmimet e naftës i janë rikthyer humbjeve në sesionin e sotëm, por megjithatë po qendrojnë pranë nivelit më të lartë për këtë vit. Investitorët po e cilësojnë një sesion pauze ditën e sotme, ndërkohë që një ditë më parë çmimet u rritën ndjeshëm, për shkak të rënies së rezervave në SHBA dhe marrëveshjes së OPEC për të ulur prodhimin. Nafta Brent e Londrës po tregtohet në rreth 68.1 dollarë për fuçi, ndërsa nafta Bruto amerikane po tregtohet në rreth 59.7 dollarë për fuçi.
Në sesionin e kaluar, ky bençmark u rrit përkohësisht mbi nivelin e 60 dollarëve. Gjatë këtij viti, çmimet e naftës kanë fituar rreth 1/3, kryesisht si pasojë e marrëveshjes së OPEC dhe Rusisë për të ulur prodhimin dhe sanksioneve amerikane ndaj Iranit dhe Venezuelës. Ulja e prodhimit ka ndikuar edhe në rënien e rezervave globale. Kompania e konsulencës, JBC Energy, vlerëson se rezervat globale do të kenë rënë me rreth 40 milionë fuçi, që nga mesi i janarit.
Vetëm javën e kaluar, rezervat e naftës në SHBA ranë me 9.6 milionë fuçi, rënia më e madhe që nga korriku i vitit të kaluar. Gjithashtu, prodhimi në Amerikë u rikthye sërish në nivelin rekord prej 12.1 milionë fuçi në ditë, gjatë javës së kaluar. Në anën tjetër, prodhimi i naftës nga vendet anëtare të OPEC ra në 30.7 milionë fuçi në ditë në shkurt, nga 32.8 milionë fuçi që ishte në mes të vitit 2018. Shtetet e Bashkuara të Amerikës synojnë të ulin eksportet e Iranit me 20%, poshtë 1 milionë fuçive në ditë, duke i kërkuar vendeve importuese të reduktojnë blerjet, në mënyrë që të shmangin sanksionet e Uashingtonit.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.