Nafta, në rënie të lehtë – Investitorët, të shqetësuar për ngadalësimin e kërkesës

Nafta po qëndron në rënie të lehtë gjatë sesionit të sotëm, për shkak të shqetësimeve se lufta tregtare do të dëmtojë kërkesën globale për naftë.

Në anën tjetër, humbjet po kufizohen nga sulmet ndaj dy anijeve cisternë në Gjirin e Omanit. Nafta Brent e Londrës po tregtohet në rreth 61.2 dollarë për fuçi, ndërsa nafta Bruto amerikane po tregtohet në rreth 52 dollarë për fuçi. Në mbyllje të sesionit të sotëm, dy bençmarkët kryesorë pritet të publikojnë humbje prej rreth 3%. Agjencia Ndërkombëtare e Energjisë uli parashikimin për rritjen e kërkesës gjatë këtij viti me 100 mijë fuçi në ditë, në totalin e 1.2 milionë fuçive, për shkak të përshkallëzimit të luftës tregtare.

Por, agjencia me bazë në Paris deklaroi se gjatë vitit 2020 kërkesa do të rritet me 1.4 milionë fuçi në ditë. Të enjten edhe Organizata e Vendeve Eksportuese të Naftës, OPEC, uli parashikimin për rritjen e kërkesës gjatë këtij viti, në 1.14 milionë fuçi në ditë. Në sesionin e kaluar, ndërkohë, sulmet ndaj dy anijeve cisternë në Gjirin e Hormuzit. Kjo ishte hera e dytë brenda një muaji që tankerat bëhen objekt i sulmeve, në zonën më të rëndësishme në botë për qarkullimin e naftës.

Uashingtoni, menjëherë akuzoi Iranin për këto sulme, por Teherani mohoi të ketë lidhje. Tensionet në Lindjen e Mesme janë përshkallëzuar, që kur presidenti amerikan, Donald Trump u tërhoq nga marrëveshja bërthamore mes Teheranit dhe fuqive të mëdha. Sekretari amerikan i Shtetit, Mike Pompeo, tha se Irani qëndron prapa sulmeve.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.