Nafta në rënie të lehtë – Ndikon rritja e numrit të puseve në SHBA dhe Kanada
Çmimet e naftës po qëndrojnë në rënie të lehtë në sesionin e sotëm, por megjithatë po tregtohen pranë nivelit më të lartë që nga dhjetori i vitit 2014.
Ndikimi vjen nga rritja e aktivitetit të shpim-kërkimit në Shtetet e Bashkuara të Amerikës dhe në Kanada, që përkthehet në një prodhim më të lartë.
Megjithatë, rënia është kufizuar nga vazhdimi i marrëveshjes për uljen e prodhimit nga OPEC dhe Rusia me 1.8 milionë fuçi në ditë. Nafta Brent e Londrës po tregtohet pranë 69.8 dollarëve për fuçi, ndërsa nafta Bruto amerikane po tregtohet në rreth 64.4 dollarë për fuçi.
Në fund të javës së kaluar, të dy bençmarkët prekën nivelin më të lartë që nga dhjetori i vitit 2014. Deri më tani, çmimet janë mbështetur nga ulja e prodhimit nga Organizata e Vendeve Eksportuese të Naftës dhe Rusia, në përpjekje për të rritur çmimet.
Marrëveshja ka filluar në janar të 2017 dhe përfundon në fund të këtij viti. Kjo ka bërë që çmimet të rriten me rreth 13%, që nga dhjetori i vitit të kaluar. Çmimet janë mbështetur edhe nga disa faktorë të tjerë, duke përfshirë edhe rreziqet politike.
Për këtë arsye, investitorët kanë rritur pozicionet e tyre afatgjata në kontratat e naftës. Por, megjithatë rritja e ndjeshme që nga dhjetori, ka bërë që analistët të paralajmërojnë për një korrektim të çmimeve, në kahun e poshtëm.
Përsa i përket të dhënave ekonomike, kompanitë amerikane të energjisë kanë shtuar me 10 njësi, numrin e puseve aktive, gjatë javës që u mbyll më 12 janar, në totalin e 752 puseve.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.