Nafta, në rënie të lehtë – Ndikon rritja e rezervave në SHBA
Çmimet e naftës po qëndrojnë në rënie të lehtë gjatë sesionit të sotëm, duke publikuar humbje për të dytën ditë me radhë, për shkak se të dhënat treguan një rritje të rezervave të naftës bruto dhe të karburanteve të distiluara në Shtetet e Bashkuara të Amerikës. Këto të dhëna kanë shtuar më tej presionin ndaj OPEC, që po ulur prodhimin me 1.8 milionë fuçi në ditë, nga janari i 2017 deri në fund të këtij viti.
Nafta Bruto amerikane po tregtohet në rreth 62.8 dollarë për fuçi, ndërsa në sesionin e kaluar humbi rreth 90 cent. Nafta Brent e Londrës po tregtohet në rreth 66.6 dollarë për fuçi, pas rënies me 87 cent në sesionin e kaluar. Referuar të dhënave, rezervat e naftës në SHBA u rritën gjatë javës së kaluar, së bashku me importet.
Sipas Institutit Amerikan të Naftës rezervat e naftës bruto u rritën me 933 mijë fuçi në totalin e 421.2 milionë fuçive, gjatë javës që u mbyll më 23 shkurt. Gjithashtu, prodhimi në Shtetet e Bashkuara të Amerikës, që po qëndron në rreth 10.27 milionë fuçi në ditë po kërcënon marrëveshjen e OPEC, Rusisë dhe aleatëve të tjerë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.