Nafta, në rënie të lehtë – Ngadalësimi i ekonomisë globale rrëzon çmimet

Çmimet e naftës po qendrojnë në rënie të lehtë në sesionin e sotëm, me Brentin e Londrës që është larguar më tej nga niveli prej 70 dollarë për fuçi. Megjithatë, humbjet po kufizohen nga rreziqet gjeopolitike. Nafta Brent e Londrës po tregtohet në rreth 69.2 dollarë për fuçi, ndërsa në sesionin e kaluar preku nivelin më të lartë që nga 12 nëntori, prej 70.03 dollarë për fuçi. Nafta Bruto amerikane po tregtohet në rreth 62 dollarë për fuçi.

Gjithsesi, dy bençmarkët kryesorë pritet të publikojnë fitime për të pestën javë me radhë. Çmimet po gjenden nën presion për shkak të shqetësimeve që kanë të bëjnë me ngadalësimin e ekonomisë globale, që mund të dëmtojë edhe konsumin. Përsa i përket tregtisë, presidenti amerikan, Donald Trump, deklaroi  se Uashingtoni dhe Pekini janë shumë pranë arritjes së marrëveshjes mbi tregtinë, por shfaqi shenja hezitimi në heqjen e tarifave prej 250 miliardë ndaj produkteve kineze, një kërkesë kjo nga qeveria e Kinës.

Edhe përshkallëzimi i konfliktit në Libi ka ofruar një mbështetje për çmimet. Njëkohësisht, zëvendësministri i jashtëm i Venezuelës nuk e përjashtoi mundësinë që në vend të mbërrijnë më shumë trupa ruse, sipas një marrëveshjeje të nënshkruar mes dy vendeve.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.