Nafta në rënie të lehtë – Prodhimi në SHBA rritet në 10.4 milionë fuçi në ditë

Çmimet e naftës po qëndrojnë në rënie të lehtë në sesionin e sotëm, për shkak të rritjes së prodhimit në Shtetet e Bashkuara të Amerikës, që kërcënon marrëveshjen e OPEC për uljen e prodhimit me 1.8 milionë fuçi në ditë.

Nafta Brent e Londrës po tregtohet në rreth 69.3 dollarë për fuçi, ndërsa nafta Bruto amerikane po tregtohet në rreth 65.1 dollarë për fuçi. Të dy bençmarkët kryesorë prekën nivelin më të lartë që nga fillimi i shkurtit, në sesionin e kaluar.

Megjithatë, tregu vijon të gjendet nën presion për shkak të rritjes së prodhimit në SHBA. Referuar të dhënave, prodhimi i naftës bruto në SHBA u rrit në 10.4 milionë fuçi në ditë, gjatë javës që u mbyll më 16 mars.

Që nga mesi i vitit 2016, prodhimi në SHBA është rritur ne rreth 25%. Në një shenjë të kërkesës së shëndetshme, rezervat e naftës në ekonominë më të madhe në botë, ranë me 2.6 milionë fuçi gjatë javës së kaluar, në totalin e 428.31 milionë fuçive.

Në ditën e mërkurë, OPEC deklaroi se, ulja e prodhimin po jep efekte në rënien e rezervave globale të naftës, që gjenden tashmë pranë mesatares 5-vjeçare. Për këtë arsye, banka Goldman Sachs parashikon se, nafta Brent mund të rritet deri në 82.5 dollarë për fuçi në mes të këtij viti.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.