Nafta, në rënie të lehtë – Rezervat në SHBA rriten me 3.5 milionë fuçi
Çmimet e naftës po qendrojnë në rënie të lehtë në sesionin e sotëm, ndërsa investitorët janë në pritje të takimit të OPEC, që zhvillohet në datën 6 dhjetor. Organizata e Vendeve Eksportuese të Naftës, Rusia dhe aleatët e tjerë do të mblidhen në Vjenë javën e ardhshme për të diskutuar një ulje të mundshme të prodhimit, deri në 1.4 milionë fuçi naftë në ditë. Nafta Brent e Londrës po tregtohet në rreth 60 dollarë për fuçi, ndërsa nafta Bruto amerikane po tregtohet në rreth 51.5 dollarë për fuçi.
Që nga fillimi i tetorit, kur tregtohej në nivelin më të lartë në 4 vitet e fundit, nafta Brent ka rënë me rreth 30%, për shkak të shqetësimeve se furnizimi do të tejkalojë kërkesën në vitin 2019. Gjithashtu, investitorët po presin edhe takimin e G20, që zhvillohet këtë fundjavë në Argjentinë, ku në fokus të diskutimeve do të jetë lufta tregtare SHBA-Kinë.
Ndërkohë, referuar të dhënave në SHBA rezervat e naftës u rritën për të dhjetën javë me radhë. Instituti Amerikan i Naftës, që është një grup industrial, deklaroi se rezervat u rritën me 3.5 milionë fuçi naftë në ditë, një shifër më e lartë se parashikimet e analistëve. Investitorët po presin të dhënat zyrtare të qeverisë, që publikohet më vonë, gjatë sesionit të sotëm.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.