Nafta, në rënie të lehtë – Rezervat në SHBA u rritën me 1.3 mln fuçi javën e kaluar

Çmimet e naftës po qendrojnë në rënie të lehtë në sesionin e sotëm, për shkak të rritjes së rezervave në SHBA dhe nivelit rekord të prodhimit. Në anën tjetër, humbjet po kufizohen nga marrëveshja e OPEC dhe Rusisë për të ulur prodhimin me 1.2 milionë fuçi në ditë. Nafta Brent e Londrës po tregtohet në rreth 62.3 dollarë për fuçi, ndërsa nafta Bruto amerikane po tregtohet në rreth 53.6 dollarë për fuçi.

Rezervat e naftës bruto në SHBA u rritën me 1.3 milionë fuçi, gjatë javës së kaluar në totalin e 447.21 milionë fuçive, deklaroi Administrata për Informimin mbi Energjinë. Ndërkohë, prodhimi mesatar i naftës në SHBA qendroi në rekordin e 11.9 milionë fuçive në ditë, të regjistruar në fund të vitit të kaluar. Tashmë, Amerika është prodhuesi më i madh i naftës në botë, duke lënë pas Rusinë dhe Arabinë Saudite. Megjithatë, ekzistojnë shqetësime se, ngadalësimi i ekonomisë globale mund të dëmtojë kërkesën për naftë.

Referuar të dhënave të publikuara në Gjermani, prodhimi industrial ra për të katërtin muaj me radhë, gjatë dhjetorit. Në fokus të investitorëve janë edhe sanksionet amerikane ndaj Venezuelës. Uashingtoni deklaroi javën e kaluar se 28 kompani të huaja nuk do të kenë mundësi të blejnë naftën e këtij vendi, pasi është bllokuar procesi i pagesave në dollarë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.