Nafta, në rritje me mbi 1% – Rezervat në SHBA bien me 11.1 milion fuçi javën e kaluar

Nafta po qëndron në rritje edhe gjatë sesionit të sotëm, pasi të dhënat e industrisë në SHBA treguan një rënie të rezervave me 11.1 milionë fuçi, gjatë javës që u mbyll më 23 gusht. Në fokus të investitorëve është edhe lufta tregtare SHBA-Kinë.

Çmimet e naftës janë rritur ndjeshëm gjatë sesionit të sotëm, përmbi 1%, pasi të dhënat e industrisë në SHBA treguan një rënie më të madhe se parashikimet të rezervave, gjatë javës së kaluar. Kjo ka larguar përkohësisht shqetësimet për ngadalësimin e rritjes ekonomike, si pasojë e luftës tregtare SHBA-Kinë.

Nafta Brent e Londrës po tregtohet mbi 60 dollarë për fuçi, ndërsa nafta Bruto amerikane po tregtohet në rreth 55.6 dollarë për fuçi. Referuar të dhënave të publikuara nga Instituti Amerikan i Naftës rezervat e naftës ranë ndjeshëm, me 11.1 milionë fuçi, gjatë javës që u mbyll më 23 gusht, ndërsa analistët parashikonin një rënie me 2 milionë fuçi.

Megjithatë, investitorët po presin të dhënat zyrtare që publikohen më vonë gjatë ditës së sotme, nga administrata për informimin mbi energjinë. Megjithatë, shqetësimet për ngadalësimin e ekonomisë globale, sidomos si pasojë e luftës tregtare mes dy ekonomive më të mëdha në botë, kanë kufizuar fitimet.

Të hënën, presidenti amerikan Donald Trump shprehu besimin se Kina ishte e sinqertë kur kërkonte arritjen e një marrëveshjeje. Por, të martën shqetësimet dolën sërish në sipërfaqe, pasi ministria e jashtme kineze tha se nuk kishte dëgjuar për asnjë telefonatë mes Shteteve të Bashkuara dhe Kinës, duke shtuar se shpreson që Uashingtoni të ndalojë veprimet e gabuara dhe të krijojë kushtet për bisedime.

Javën e kaluar, ministria kineze e tregtisë deklaroi se do të vendosë tarifa shtesë prej 5% deri në 10% për 5,078 që kanë origjinë Shtetet e Bashkuara.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.