Nafta, në rritje të lehtë – Arabia synon të bindë OPEC dhe Rusinë për të ulur prodhimin

Çmimet e naftës po qëndrojnë në rritje të lehtë në sesionin e parë të kësaj jave, për shkak të pritshmërive se, Arabia Saudite do të detyrojë vendet e tjera të OPEC, mbase edhe Rusinë, për të ulur prodhimin në fund të këtij viti. Nafta Brent e Londrës po tregtohet në rreth 67 dollarë për fuçi, ndërsa nafta Bruto amerikane po tregtohet në rreth 56.8 dollarë për fuçi.

Investitorët po fillojë të llogarisin se sa do të jetë mbifurnizimi i tregut, në një kohë që Arabia Saudite synon një ulje të prodhimit me 1.4 milionë fuçi në ditë, për të parandaluar një rënie drastike të çmimeve.

Ministri rus i Energjisë, Alexander Novak, deklaroi se Rusia, që nuk është një vend anëtar i OPEC, planifikon të nënshkruajë një partneritet afatgjatë me grupin, ndërsa detajet do të diskutohen në takimin e 6 dhjetorit në Vjenë. Por, pavarësisht rritjes së çmimeve për të katërtin sesion me radhë, nafta vijon të gjendet nën presion pasi SHBA, Rusia dhe Arabia Saudite e kanë rritur prodhimin në nivele rekord. Gjithashtu, investitorët janë të shqetësuar se, lufta tregtare mes SHBA dhe Kinës do të dëmtojë kërkesën për naftë, gjatë vitit të ardhshëm.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.