Nafta në rritje të lehtë – Çmimet nuk ndikohen nga tarifat ndaj produkteve kineze
Çmimet e naftës po qëndrojnë në rritje në sesionin e fundit të javës, pavarësisht se nga sot hynë në fuqi tarifat e reja prej 25% ndaj produkteve kineze në vlerën e 200 miliardë dollarëve, të njoftuara më herët nga presidenti Donald Trump.
Gjithashtu, Trump paralajmëroi se shumë shpejt do të aplikohet tarifa prej 25% edhe për 325 miliardë dollarë mallra kinezë. Në këtë mënyrë, është përshkallëzuar më tej tensioni tregtar mes dy ekonomive më të mëdha në botë. Nafta Brent e Londrës po tregtohet në rreth 70.8 dollarë për fuçi, ndërsa nafta Bruto amerikane po tregtohet në rreth 62.1 dollarë për fuçi. Shtetet e Bashkuara përshkallëzuan luftën e tarifave me Kinën, duke i rritur në 25% nga 10% që ishin më parë.
Megjithatë, negociatat po vijojnë edhe gjatë ditës së sotme dhe ekziston një shpresë e vogël për arritjen e një marrëveshjeje. Çmimet po gjejnë një mbështetje nga marrëveshja e OPEC dhe Rusisë për të ulur prodhimin me 1.2 milionë fuçi në ditë. Një mbështetje tjetër çmimet po e gjejnë nga parashikimet se kërkesa për naftë do të rritet gjatë këtij viti, me një mesatare prej 1.4 milionë fuçi në ditë. Por, në terma afatgjatë çmimet mund të gjenden nën presion pasi rritja e tensionit tregtar mes dy ekonomive më të mëdha në botë do të dëmtojnë kërkesën për naftë.
SHBA dhe Kina përfaqësojnë rreth 34% të konsumit global të naftës.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.