Nafta, në rritje të lehtë – Eksportet e Arabisë Saudite, poshtë 7 mln fuçive
Çmimet e naftës po qëndrojnë në rritje në sesionin e fundit të javës, për shkak të rënies së eksporteve nga Arabia Saudite dhe uljes së rezervave në SHBA. Nafta Bruto amerikane po tregtohet në rreth 64 dollarë për fuçi, ndërsa nafta Brent e Londrës po tregtohet në rreth 72 dollarë për fuçi.
Eksportet e naftës bruto nga Arabia Saudite ranë me 277 mijë fuçi në ditë, gjatë shkurtit, poshtë nivelit të 7 milionë fuçive. Gjithashtu, edhe rezervat e naftës bruto dhe të karburanteve të distiluara në SHBA regjistruan rënie, gjatë javës së kaluar. Në anën tjetër, firmat amerikane të energjisë e reduktuan numrin e puseve aktive, gjatë kësaj jave, për herë të parë në tre javët e fundit. Referuar të dhënave, kompanitë e reduktuan me 8 njësi numrin e puseve, në totalin e 825 puseve aktive.
Megjithatë, fitimet janë kufizuar nga forcimi i dollarit amerikan, për shkak të të dhënave pozitive mbi shitjet me pakicë në ekonominë më të madhe në botë. Ndërkohë, volumi i tregtisë ka qenë i ulët për shkak se tregjet amerikane dhe ato europiane qëndrojnë pushim, për shkak të së “Premtes së Mirë”, në vigjilje të Pashkëve. Gjatë këtij viti, çmimet janë mbështetur kryesisht nga marrëveshja e OPEC dhe Rusisë për të ulur prodhimin me 1.2 milionë fuçi në ditë.
Por, furnizimi i tregut është tkurrur edhe më tej për shkak të rënies së pavullnetshme të prodhimit në Venezuelë dhe Iran, si pasojë e sanksioneve amerikane.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.