Nafta, në rritje vjetore rekord – Tregtia e fundit e “vakët”. Por, norma vjetore, më e larta që prej vitit 2009
Nafta ka rënë lehtë në nisjen e sesionit të së Premtes, por pritet të tregojnë rritjen më të madhe vjetore në 12 vite, nxitur nga rimëkëmbja ekonomike botërore dhe kufizimeve në prodhim, pavarësisht rritjes së infeksioneve me koronavirus në nivele rekord. Nafta brent ra me 3 cent në 79.5 dollarë për fuçi, ndërsa nafta bruto amerikane humbi 0.1% në 76.89 dollarë për fuçi. Nafta Brent pritet ta mbyllë vitin në rritje me 53%, ndërsa nafta bruto amerikane, me 58%, që është performanca më e fortë për të 2 çmimet referencë që prej vitit 2009, kur çmimet shtuan mbi 70%.
Të dy çmimet prekën majën e vitit 2021 në Tetor, me naftën Brent që ndodhej në 86.7 dollarë për fuçi, niveli më i lartë që prej 2018-s, dhe naftën bruto amerikane në 85.41 dollarë, niveli më i lartë që prej vitit 2014. Çmimet botërore të naftës pritet të rriten mëtej në vitin e ardhshëm, ndërkohë që kërkesa për karburant e avionëve rifiton vrull. Analistët thonë se pavarësisht Delta, Omicron dhe të gjithë llojeve të karantinës e kufizimeve në udhëtime, kërkesa për naftë ka qëndruar e fortë.
Megjithatë, pasi u rritën për 7 ditë me radhë, çmimet e naftës ngecën ditën e Premte, ndërkohë që rastet me Covid-19 arritën nivelet më të mëdha që prej nisjes së pandemisë në shumicën e vendeve në Botë, nga Australia e deri tek Shtetet e Bashkuara. Ekspertë e shëndetësisë në SHBA paralajmëruan amerikanët që të përgatiten për ndërprerje të mëdha të aktiviteteve në javët e ardhshme, ndërkohë që infeksionet pritet të përkeqësohen përballë festave të Vitit të Ri dhe rihapjes së shkollave. Me naftën në rreth 80 dollarë për fuçi, Organizata e Vendeve Eksportuese të Naftës, me shumë mundësi pritet të mbajë premtimin e rritjes së prodhimit me 400,000 fuçi në ditë në takimin e 4 Janarit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.