Nafta, pranë nivelit maksimal të 2019 – Çmimet mbështeten nga ulja e prodhimit nga OPEC

Çmimet e naftës po qendrojnë pranë nivelit më të lartë për vitin 2019 dhe vijojnë të mbështeten nga ulja e prodhimit nga OPEC dhe nga sanksionet e Shteteve të Bashkuara ndaj Iranit dhe Venezuelës. Megjithatë, investitorët janë të shqetësuar për ngadalësimin e ekonomisë globale. Nafta Bruto amerikane po tregtohet në rreth 57.1 dollarë për fuçi, ndërsa nafta Brent e Londrës po tregtohet në rreth 66.9 dollarë për fuçi.

OPEC dhe lideri de facto i organizatës, Arabia Saudite, së bashku me Rusinë, kanë filluar uljen e prodhimit me 1.2 milionë fuçi në ditë, për të parandaluar një rritje të rezervave globale. Gjithashtu, edhe Nigeria, që është një vend anëtar i OPEC, sinjalizoi se do të ulë prodhimin, pas rritjes në Janar. Megjithatë, analistët shprehen se, ngadalësimi i ekonomisë globale, që ka filluar vitin e kaluar, do të parandalojë një rritje të ndjeshme të çmimeve të naftës.

Një faktor tjetër që po parandalon rritjen e çmimeve është edhe rritja e prodhimit të naftës argjilore në SHBA, me më shumë se 2 milionë fuçi në ditë, gjatë vitit të kaluar, në një rekord prej 11.9 milionë fuçi. Rritja e prodhimit ka rezultuar edhe në rritjen e rezervave të naftës. Referuar të dhënave të publikuara në SHBA, rezervat e naftës bruto u rritën me 1.3 milionë fuçi, gjatë javës që u mbyll më 15 shkurt, në totalin e 448.5 milionë fuçive.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.