Nafta publikon fitime javore – Çmimet mbështeten nga tensionet në Lindjen e Mesme

Çmimet e naftës po qëndrojnë në rritje gjatë sesionit të sotëm dhe pritet të publikojnë fitime javore, pasi tensionet në Lindjen e Mesme mbi Iranin nuk po gjejnë një zgjidhe. Në anën tjetër, ngadalësimi i rritjes ekonomike dhe lufta tregtare SHBA-Kinë kanë kufizuar fitimet.

Nafta Brent e Londrës po tregtohet në rreth 63.5 dollarë për fuçi, ndërsa nafta Bruto amerikane po tregtohet në rreth 56 dollarë për fuçi. Tensionet vijojnë të jenë të larta në Gjirin e Hormuzit, ngushtica më e rëndësishme në botë për kalimin e naftës, pasi Irani refuzoi të lirojë anijen britanike të sekuestruar javën e kaluar. Sekretari amerikan i shtetit, Mike Pompeo tha se Uashingtoni i ka kërkuar Japonisë, Francës, Gjermanisë, Koresë së Jugut, Australisë dhe shumë vendeve të tjera ti bashkohen nismës për sigurinë detare në Lindjen e Mesme, në mënyrë që nafta dhe produktet e tjera të kalojnë të sigurta në këtë ngushticë.

Megjithatë, reagimi i çmimeve ndaj tensioneve në Gjirin e Hormuzit ka qenë i vogël, pasi shumica e investitorëve nuk presin një konflikt ushtarak, që mund të pengonte qarkullimin e anijeve. Gjithashtu, çmimet kanë gjetur një mbështetje nga rënia e rezervave të naftës në SHBA. Ngadalësimi i prodhimit dhe tregtisë në rang global, që ka dëmtuar edhe kërkesën për naftë, vjen kryesisht nga lufta tregtare SHBA-Kinë,  që zgjat tashme prej një viti. Bisedimet mes dy ekonomive më të mëdha në botë dështuan në muajin maj, por pritet të rifillojnë javën e ardhshme në Shanghai.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.