Nafta rikthehet në rritje – Fitimet kufizohen nga rritja e prodhimit në SHBA

Çmimet e naftës e kanë filluar në rënie në sesionin e sotëm, por megjithatë në orët e pasdites janë kthyer në territor pozitiv. Gjithsesi, çmimet po gjenden nën presion për shkak të rritjes së pashmangshme të prodhimit në Shtetet e Bashkuara të Amerikës. Nafta Bruto amerikane po tregtohet në rreth 61.2 dollarë për fuçi, ndërsa nafta Brent e Londrës po tregtohet në rreth 64.8 dollarë për fuçi.

Në sesionin e së hënës, ndërkohë, të dy bençmarkët ranë me rreth 1%. Në anën tjetër, kërkesa e shëndetshme dhe ulja e prodhimit nga OPEC dhe aleatët, po parandalon një rënie të mëtejshme të çmimeve. Edhe investitorët janë tërhequr nga vendosja e basteve për rritjen e çmimeve, pikërisht për shkak të rritjes së prodhimit në SHBA, që po qëndron mbi 10 milionë fuçi në ditë dhe deri në fund të këtij viti parashikohet të ngjitet në rreth 11 milionë fuçi në ditë, një nivel i përafërt me Rusinë.

Sipas vlerësimeve të Administratës për Informimin mbi Energjinë, prodhimi i naftës argjilore në SHBA parashikohet të rritet me 131 mijë fuçi në ditë gjatë muajit prill, krahasuar me marsit.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.