Nafta rritet lehtë – Ndikon rënia e numrit të puseve në SHBA
Çmimet e naftës po qëndrojnë në rritje të lehtë në sesionin e sotëm, për shkak të rënies së aktivitetit të shpim-kërkimit në Shtetet e Bashkuara të Amerikës dhe për shkak të pritshmërive se Uashingtoni do të rikthejë sanksionet ndaj Iranit.
Nafta Bruto amerikane po tregtohet në rreth 65.2 dollarë për fuçi, ndërsa nafta Brent e Londrës po tregtohet ne rreth 69.7 dollarë për fuçi.
Në anën tjetër, kontratat “futures” të Shanghait po tregtohen në 416.7 juan ose 66.39 dollarë për fuçi, në rritje me 1.1%. Gjithsesi, analistët shprehen se, tregu i naftës vijon të jetë nën tension për shkak të paqartësive nëse administrata amerikane do të rivendosë ose jo sanksione ndaj Iranit.
Përsa i përket të dhënave, kompanitë amerikane të energjisë e ulën me 7 njësi numrin e puseve aktive, gjatë javës që u mbyll më 29 mars, në totalin e 797 puseve. Kjo ishte hera e parë në tre javët e fundit, që bie aktiviteti i shpim-kërkimit.
Në anën tjetër, çmimet po gjejnë një mbështetje nga mundësitë që OPEC dhe Rusia të shtyjnë marrëveshjen për uljen e prodhimin edhe në vitin 2019.
Gjithsesi, volumi i shkëmbimeve tregtare është i ulët gjatë ditës së sotme, pasi shumë tregje vijojnë të jenë pushim, me rastin e Pashkëve, sidomos në Europë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.