Nafta rritet ndjeshëm – Investitorët, të paqartë për takimin e OPEC dhe Rusisë

Çmimet e naftës janë rritur ndjeshëm në sesionin e sotëm, për shkak të paqartësive që kanë të bëjnë me takimin e OPEC dhe mbi aftësitë e kartelit për të manaxhuar rritjen e prodhimit, gjatë takimit që zhvillohet sot në Vjenë. Nafta Brent e Londrës po tregtohet pranë 74.3 dollarëve për fuçi, ndërsa nafta Bruto amerikane po tregtohet në rreth 66.5 dollarë për fuçi. Organizata e Vendeve Eksportuese të Naftës, Rusia dhe disa vende të tjera prodhuese do të mblidhen në Vjenë më vonë gjatë ditës, për të përcaktuar politikat e naftës.

Që në fillim të vitit 2017, ky grup ka filluar uljen e prodhimit me 1.8 milionë fuçi në ditë dhe kjo marrëveshje është në fuqi deri në fund të këtij viti. Arabia Saudite dhe Rusia janë në favor të rritjes së prodhimit, por disa vende të tjera, duke përfshirë Iranin, kanë shprehur të kundërtën. Për këtë arsye, analistët mendojnë se, takimi do të jetë mjaft i vështirë. Një pjesë e analistëve parashikojnë një rritje të prodhimit midis 300 mijë dhe 600 mijë fuçi, por ka edhe parashikime më optimiste deri në 1.5 milionë fuçi në ditë.

Në treg ekzistojnë edhe paqartësi të tjera që nuk kanë të bëjnë me OPEC, siç është kërcënimi i Kinës për të tarifuar me 25% naftën që importohet nga SHBA. Nëse ky propozim do të zbatohet, atëherë nafta amerikane nuk do të jetë konkurruese në Kinë, duke detyruar kompanitë në SHBA të gjejnë blerës së tjerë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.