Nafta rritet ndjeshëm – Tensioni SHBA-Iran, pas rrëzimit të dronit, mbështet çmimet

Nafta është rritur ndjeshëm gjatë sesionit të sotëm, për shkak të përshkallëzimit së tensionit në Lindjen e Mesme. Irani rrëzoi me raketë një dron spiun të Shteteve të Bashkuara, duke rritur frikën për përplasje mes Teheranit dhe Uashingtonit.

Gjithashtu, çmimet po gjejnë një mbështetje të lehtë nga pritshmëritë se Rezerva Federale do të ulë normat e interesit në takimin e muajit të ardhshëm, për të mbështetur rritjen në vendin më të madh të konsumit të naftës në botë. Nafta Brent e Londrës po tregtohet në rreth 63 dollarë për fuçi, ndërsa nafta Bruto amerikane po tregtohet në rreth 55 dollarë për fuçi. Analistët shprehen se janë disa faktorë që po mbështesin çmimet.

Sipas një zyrtari amerikan, droni u rrëzua në hapësirën ndërkombëtare, mbi Gjirin e Hormuzit nga raketat tokë-ajër. Ndërsa Garda Revolucionare e Iranit tha se droni po fluturonte mbi Iranin jugor. Tensionet janë rritur ndjeshëm në Lindjen e Mesme, rajon që prodhon rreth 20% të naftës globale, pas sulmeve ndaj dy anijeve cisternë në Gjirin e Hormuzit javën e kaluar, dhe Shtetet e Bashkuara akuzuan Iranin. Në anën tjetër, shqetësimet për ngadalësimin e ekonomisë globale dhe lufta tregtare SHBA-Kinë, po kufizojnë fitimet.

Në muajin prill, nafta preku nivelin më të lartë për 2019, pranë 75 dollarëve për fuçi. Referuar të dhënave të publikuara në SHBA, rezervat e naftës ranë me 3.1 milionë fuçi gjatë javës së kaluar, ndërsa analistët parashikonin një rënie me 1.1 milionë fuçi.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.