Nafta, sesioni i gjashtë në rritje – Ndikon mundësia e rikthimit të sanksioneve ndaj Iranit
Çmimet e naftës po qëndrojnë në rritje edhe në sesionin e sotëm, duke publikuar fitime për të gjashtin sesion me radhë dhe përkohësisht kaloi nivelin teknik të 75 dollarëve për fuçi.
Analistët presin që furnizimi i tregut të jetë i kufizuar për shkak të mundësive që Shtetet e Bashkuara të rikthejnë sanksionet ndaj Iranit, në një kohë që OPEC vijon me uljen e prodhimit.
Nafta Brent e Londrës po tregtohet në rreth 74.7 dollarë për fuçi, niveli më i lartë që nga nëntori i vitit 2014. Që nga niveli më i ulët për këtë vit, të regjistruar në shkurt, nafta Brent është rritur me rreth 20%.
Nafta Bruto amerikane po tregtohet në rreth 68.7 dollarë për fuçi, ndërsa në sesionin e kaluar, ky bençmark u rrit deri në 69.56 dollarë për fuçi, gjithashtu niveli më i lartë që nga nëntori i vitit 2014.
Sipas analistëve, arsyeja kryesore që po mbështet çmimet është rritja e mundësive që Shtetet e Bashkuara të rikthejnë sanksionet ndaj Iranit, pasi dyshohet se nuk e ka respektuar marrëveshjen për armët bërthamore, të arritur në vitin 2015.
Shtetet e Bashkuara kanë kohë deri më 12 maj për të vendosur nëse do të rivendosin ose jo sanksione ndaj Teheranit. Në anën tjetër, arsyeja që po kufizon deri diku fitimet është rritja e prodhimit të naftës në SHBA.
Që nga mesi i vitit 2016, prodhimi amerikan është rritur në 10.54 milionë fuçi në ditë, duke kaluar Arabinë Saudite. Si rezultat i kësaj, nafta amerikane po e rrit prezencën në tregjet globale, duke filluar nga Europa e deri në Azi.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.