Nafta, sesioni i katërt në rritje – Çmimet mbështeten nga ulja e prodhimit nga OPEC
Nafta po qendron në rritje edhe në ditën e sotme, duke publikuar fitime për të katërtin sesion me radhë. Nafta Brent e Londrës po tregtohet pranë 70 dollarëve për fuçi, niveli më i lartë në 5 muajt e fundit. Çmimet vijojnë të mbështeten nga ulja e prodhimit nga OPEC dhe nga sanksionet amerikane ndaj Iranit dhe Venezuelës, që kanë eklipsuar rritjen surprizë të rezervave në SHBA, gjatë javës së kaluar. Nafta Brent e Londrës po tregtohet në rreth 70 dollarë për fuçi, niveli më i lartë që nga 12 nëntori.
Ndërsa nafta Bruto amerikane po tregtohet në rreth 62.7 dollarë për fuçi, niveli më i lartë që nga 7 nëntori. Gjatë këtij viti, çmimet e naftës janë mbështetur në pjesën më të madhe nga marrëveshja e OPEC+ për të ulur prodhimin me rreth 1.2 milionë fuçi në ditë, dhe nga sanksionet e Uashingtonit ndaj Iranit dhe Venezuelës. Sipas një vëzhgimi të Reuters, furnizimi nga vendet e OPEC ra në nivelin më të ulët në katër vite, gjatë marsit. Në Rusi, ndërkohë, prodhimi i naftës ra në 11.3 milionë fuçi në ditë, gjatë marsit.
Referuar të dhënave në SHBA nga Instituti amerikan i Naftës, që është një institucion privat, rezervat u rritën në mënyrë surprizë gjatë javës së kaluar. Megjithatë, analistët po presin të dhënat zyrtare që publikohet ditën e sotme nga administrata amerikane e energjisë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.