Nafta, sesioni i tretë në rënie. Ndikojnë infektimet në Indi e Japoni dhe rritja e rezervave në SHBA
Nafta po qëndron në rënie edhe në sesionin e sotëm, duke publikuar humbje për të tretin session me radhë. Rritja e infektimeve me koronavirus në Indi dhe japoni dhe rritja e rezervave të naftës në SHBA po ushtrojnë presion mbi çmimet. Nafta Brent e Londrës po tregtohet në rreth 65 dollarë për fuçi, ndërsa nafta Bruto amerikane po tregtohet në rreth 61 dollarë për fuçi.
Të dyja kontratat ranë me 2% në sesionin e kaluar. Rezervat e naftës në SHBA shënuan një rritje surprizë gjatë javës që u mbyll më 16 prill, njoftoi Agjencia për Informimin mbi Energjinë. Rezervat e naftës u rritën me 594,000 mijë fuçi, javën e kaluar, ndërsa analistët parashikonin një rënie me 3 milionë fuçi.
Ndërkohë, India që është konsumatori i tretë më i mad hi naftës në botë, raportoi një tjetër shifër rekord të infektimeve me Covid-19. Edhe Japonia, importuesi i katërt më i madh në botë i naftës, po konsideron shtyrjen e gjendjes së emergjencës në Tokyo dhe Osaka, për shkak të rritjes së infektimeve. Ndërkohë, investitorët po presin edhe takimin e OPEC dhe aleatëve të tjerë, që takohen javën e ardhshme për të diskutuar mbi politikat e prodhimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.