Nafta, sesioni i tretë në rritje – Rënia e rezervave në SHBA mbështet çmimet

Çmimet e naftës po qëndrojnë në rritje edhe në sesionin e sotëm, duke publikuar fitime për të tretin sesion me radhë. Çmimet vijojnë të mbështeten nga mbyllja e tubacionit Forties dhe nga pritshmëritë për rënien e rezervave të naftës në SHBA.

Nafta Bruto amerikane po tregtohet në rreth 57.7 dollarë për fuçi, ndërsa nafta Brent e Londrës po tregtohet në rreth 63.8 dollarë për fuçi.

Instituti Amerikan i Naftës deklaroi se, rezervat e naftës bruto në SHBA ranë me 5.2 milionë fuçi, gjatë javës që u mbyll më 15 dhjetor, në totalin e 438.7 milionë fuçive.

Tubacioni Forties, që transporton naftë nga Deti i Veriut drejt Britanisë, vijon të qëndrojë i mbyllur për shkak të disa riparimeve. Operatori i këtij tubacioni shpreson që defekti të riparohet shumë shpejt, ndërsa qëndron i mbyllur që nga 11 dhjetorit.

Megjithatë, pavarësisht këtyre zhvillimeve, rritja e çmimeve po kufizohet nga rritja e prodhimit në SHBA.

Aktualisht, Amerika prodhon rreth 9.8 milionë fuçi në ditë dhe analistët mendojnë se shumë shpejt do të tejkalohet niveli i 10 milionë fuçive, nivel i përafërt me 2 prodhuesit më të mëdhenj në botë, Arabinë Saudite dhe Rusinë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.