Nafta tregtohet e qëndrueshme – Analistët parashikojnë rritje të rezervave në SHBA
Nafta po shfaqet e qëndrueshme në sesionin e sotëm, por sërish po gjendet nën presion, për shkak të pritshmërive për rritjen e rezervave të naftës në SHBA dhe shqetësimeve se Rusia do të fillojë rritjen e prodhimit pas muajit qershor.
Analistët parashikojnë se, rezervat e naftës bruto në SHBA do të jenë rritur me 1.9 milionë fuçi, gjatë javës së kaluar, për të katërtën javë me radhë. Nafta Brent e Londrës po tregtohet në rreth 71 dollarë për fuçi, ndërsa nafta Bruto amerikane po tregtohet në rreth 63 dollarë për fuçi. Marrëveshja e OPEC dhe Rusisë ka rritur çmimet e naftës me rreth 30% gjatë këtij viti.
Por këto fitime janë kufizuar nga shqetësimet për ngadalësimin e ekonomisë globale, që mund të dëmtojë kërkesën për naftë. Ditën e hënë, Rusia shprehu sërish dëshirën për të rritur prodhimin, pas muajit qershor, kur skadon edhe marrëveshja aktuale për uljen e prodhimit me 1.2 milionë fuçi në ditë. Ministri rus i financave, shprehu shqetësimin se, Shtetet e Bashkuaa po marrin pjesë të tregut, pasi prodhimi në këtë vend është rritur në një rekord prej 12.2 milionë fuçi në ditë, duke lënë pas Rusinë dhe Arabinë Saudite.
Organizata e Vendeve Eksportuese të Naftës dhe aleatët e tjerë, me në krye Rusinë, do të takohen në qershor për të vendosur mbi politikat e naftës, për gjysmën e dytë të vitit. Analistët mendojnë se, Rusia do të kundërshtojë shtyrjen e marrëveshjes përtej qershorit.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.