Nafta tregtohet e qëndrueshme – Investitorët, në pritje të sanksioneve të SHBA ndaj Iranit
Çmimet e naftës po ndryshojnë minimalisht, gjatë sesionit të fundit të kësaj jave, pasi investitorët janë në pritje të sanksioneve amerikane ndaj Iranit, që hyjnë në fuqi javën e ardhshme. Nafta Brent e Londrës po tregtohet në rreth 73 dollarë për fuçi, ndërsa gjatë kësaj jave ky bençmark ka rënë me rreth 6% dhe me 16%, që nga fillimi i tetorit. Nafta Bruto amerikane po tregtohet në rreth 63.5 dollarë për fuçi, dhe që nga 3 tetori ka rënë me më tepër se 17%. Investitorët janë të shqetësuar mbi furnizimin e tregut, në një kohë që Uashingtoni aplikon sanksione ndaj naftës iraniane.
Megjithatë, Bloomberg raportoi se, Shtetet e Bashkuara do të lejojnë 8 vende, duke përfshirë edhe aleatët e ngushtë si Korea e Jugut dhe Japonia, por edhe Indinë, të vijojnë të blejnë naftë nga Irani edhe pas hyrjes në fuqi të sanksioneve. Në një shënim për klientët e saj, Goldman Sachs tha se, eksportet e Iranit do të bien në 1.15 milionë fuçi naftë në ditë, nga 2.5 milionë fuçi në ditë që ishin në mesin e vitit 2018.
Në anën tjetër, të dhënat e Ministrisë ruse të Energjisë, treguan se, vendi prodhoi 11.41 milionë fuçi naftë në ditë, gjatë tetorit, niveli më i lartë në 30 vitet e fundit. Edhe në Shtetet e Bashkuara prodhimi po qendron në mbi 11 milionë fuçi në ditë. Për rrjedhojë, analistët e Goldman Sachs presin që nafta Brent të bjerë drejt 65 dollarëve për fuçi deri në fund të vitit të ardhshëm, kryesisht për shkak të rritjes së prodhimit të naftës argjilore në SHBA.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.