Nafta tregtohet e qëndrueshme. Investitorët presin takimin e OPEC+, që mbahet të enjten

Nafta po tregtohet e qëndrueshme në sesionin e sotëm, ndërsa investitorët janë në pritje të takimit të OPEC dhe aleatëve, që zhvillohet të enjten. Investitorët besojnë se prodhuesit do të vendosin një shtyrje të marrëveshjes aktuale për uljen e prodhimit, për shkak të ngadalësimit të kërkesës, sidomos në Europë. Nafta Brent e Londrës po tregtohet në rreth 64 dollarë për fuçi, ndërsa nafta Bruto amerikane po tregtohet në rreth 60.5 dollarë për fuçi. Të dy bençmarkët kryesorë humbën rreth 1.3% të vlerës në sesionin e kaluar. Organizata e Vendeve Eksportuese të Naftës dhe aleatët e tjerë, me në krye Rusinë do të takohen të enjten, në një kohë që pandemia ka detyruar shumë vende europiane të ashpërsojnë masat kufizuese për shkak të rritjes së infektimeve me koronavirus. Muajin e kaluar, OPEC+ surprizoi tregjet duke pranuar një rritje të lehtë të prodhimit nga Rusia dhe Kazakistani. Referuar të dhënave të publikuara në SHBA nga Instituti Amerikan i Naftës, rezervat e naftës bruto u rritën me 3.9 milionë fuçi, gjatë javës që u mbyll më 26 mars, ndërsa analistët parashikonin një rritje prej 100 mijë fuçi. Gjithsesi, investitorët po presin të dhënat zyrtare, që publikohet më vonë gjatë ditës së sotme nga Administrata për Informimin mbi Energjinë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.