Nafta tregtohet e qëndrueshme. Pritet të publikojë humbje prej mbi 2%, gjatë kësaj jave

Nafta po tregtohet e qëndrueshme në sesionin e sotëm, ndërsa një mbështetje të lehtë po e gjen nga dobësimi i dollarit amerikan. Në anën tjetër, investitorët janë të shqetësuar për rritjen e prodhimit dhe impaktin e pandemisë te kërkesa. Nafta Brent e Londrës po tregtohet në rreth 63 dollarë për fuçi, ndërsa nafta Bruto amerikane po tregtohet në rreth 59.5 dollarë për fuçi. Një dollar më i dobët i bën lëndët e para që tregtohet në monedhën e gjelbër më të lira për investitorët që zotërojnë monedha të tjera.

Të dyja kontratat pritet të publikojnë humbje javore prej mbi 2%, kryesisht për shkak të vendimit të OPEC+ për të rritur gradualisht prodhimin duke filluar nga muaji i ardhshëm. Megjithatë, analistët parashikojnë se rezervat globale do të vijojnë rënien, në një kohë që kërkesa do të vijojë rimëkëmbjen, sidomos gjatë gjysmës së dytë të vitit. Por, rritja e infektimeve me Covid-19 në disa rajone të globit dhe problemet me vaksinimin mund të dëmtojnë kërkesën për naftë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.