Nafta vijon rritjen – Mbështetet nga greva e punëtorëve në Norvegji
Çmimet e naftës po qendrojnë në rritje gjatë sesionit të sotëm, për shkak të përshkallëzimit të shqetësimeve që kanë të bëjnë me furnizimin e tregut. Ndërkohë, nafta brent është rritur ndjeshëm pasi me qindra punonjës të naftës në Norvegji po zhvillojnë një protestë, pas dështimit të negociatave për rritjen e pagave.
Nafta Brent e Londrës po tregtohet në rreth 78.3 dollarë për fuçi, ndërsa nafta Bruto amerikane po tregtohet në rreth 74 dollarë për fuçi. Me qindra punëtorë të sektorit të naftës dhe gazit në Norvegji po zhvillojnë një grevë, për shkak të refuzimit të një propozimi për pagat, një lëvizje që do të ndikojë në prodhimin e naftës nga Deti i Veriut.
Çmimet po gjejnë një mbështetje edhe nga mundësitë e çrregullimit të furnizimit nga Lindja e Mesme. Shtetet e Bashkuara duan të reduktojnë eksportet e naftës nga Irani, që është prodhuesi i pestë më i madh në botë, duke filluar nga nëntori, që do ti detyrojë vendet e tjera të prodhojnë më tepër. Arabia Saudite dhe Rusia ranë dakord, muajin e kaluar për të rritur prodhimin, në mënyrë që ti përgjigjen kërkesës në nivele rekord.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.