Nafta zgjeron fitimet – Arabia Saudite do të ulë prodhimin përtej angazhimit
Çmimet e naftës kanë zgjeruar fitimet edhe në sesionin e sotëm, dhe po mbështeten nga plani i Arabisë Saudite për të ulur më tej prodhimin në mënyrë vullnetare, duke filluar nga muaji prill.
Gjithashtu, edhe rënie e konsiderueshme e eksporteve nga Venezuela po mbështet çmimet. Arabia Saudite, në përpjekje për të mbështetur çmimet duke ulur prodhimin, do të mbajë prodhimin edhe gjatë muajit prill poshtë niveleve të kërkuara, si pjesë e planit për të ulur eksportet. Nafta Brent e Londrës po tregtohet në rreth 66.9 dollarë për fuçi, ndërsa nafta Bruto amerikane po tregtohet në rreth 57.3 dollarë për fuçi.
Çmimet e naftës janë rritur ndjeshëm, gjatë këtij viti, kryesisht si rrjedhojë e marrëveshjes mes OPEC dhe Rusisë për të ulur furnizimin, duke filluar nga 1 janari. Në anën tjetër, rënia e eksporteve në Libi, për shkak të trazirave dhe sanksionet amerikane ndaj Venezuelës dhe Iranit kanë mbështetur çmimet. Por, rritja e vazhdueshme e prodhimit në SHBA po kufizon fitimet. Agjencia Ndërkombëtare e Energjisë deklaroi se tendenca e njëjtë e prodhimit do të vijojë deri në vitin 2024.
Në terma afatshkurtër, analistët parashikojnë se, rezervat e naftës bruto në SHBA do të jenë rritur. Sipas një sodazhi të Reuters, parashikohet një rritje e rezervave me 2.9 milionë fuçi, gjatë javës së kaluar.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.